По одигрувањето на 15. коло во Третата фудбалска лига – Југ, дојде до промена на врвот на табелата. Борец 1919 АД ја искористи шансата и со победа на гостински терен се искачи на првата позиција, додека досегашниот лидер ФК Превалец доживеа пораз во Крушево.
Велешкиот состав славеше на гостувањето во Мало Коњаре, каде со резултат 3:1 ја совлада екипата на Влазними Јуниор. До трите бода Борец стигна со головите на Миловановиќ, Мирчевски и Имеров, додека единствениот погодок за домашниот тим го постигна Бесими. Со овој триумф велешани ја искористија шансата и се вратија на лидерската позиција на табелата.
Во исто време, Превалец го запиша вториот пораз во сезоната. Тимот од Прилепско беше поразен на гостувањето кај Питу Гули во Крушево со 2:1. Домаќините до победата дојдоа со головите на Стојановски во 55. и Андреевски во 60. минута, додека Јордановски во 67. минута само успеа да го намали резултатот за гостите.
На останатите натпревари од колото, Тополка беше убедлива на свој терен и со високи 6:0 го совлада тимот на Млекар, со што значително ги подобри шансите за опстанок во лигата. Важни бодови на гостински терен освои и Башкими од Горно Јаболчиште, кој со 2:0 славеше против Младост, благодарение на головите на Лазами и Тахири.
Со ваквите резултати, трката за врвот во Третата лига Југ станува уште поинтересна, а следните кола се очекува дополнително да ја разгорат битката за лидерската позиција.