Кошаркарскиот клуб Борец Баскет од Велес го официјализираше ангажманот на американскиот кошаркар Зион Јанг, кој ќе го засили тимот во пресрет на плејофот за највисок пласман.
Јанг доаѓа од Чикаго и зад себе има богата колеџ кариера во САД, каде настапувал за неколку NCAA Division I програми – Oakland, Western Illinois и Southern Utah, при што запишал вкупно 132 настапи. Станува збор за играч кој се истакнувал со офанзивниот придонес и стабилниот шут од дистанца.
Своето прво интернационално искуство Јанг го стекнал минатата сезона во првата лига на Азербејџан, каде имал одлични бројки – во просек постигнувал 24 поени по натпревар, додавал по 4 асистенции и реализирал 40 проценти од обидите за три поени, што го вбројува меѓу поефикасните играчи во лигата.