Ќе започне вакцинација со вакцина против сезонски грип. На денешната прес – конференција Министерот за здравство, Венко Филипче, напомена дека е пристигната голема количина вакви вакцини, а процесот ќе се спроведе во здравствените установи независно од вакцинацијата против Ковид – 19. Истовремено, ќе се одвива и теренска вакцинација.
„Во однос на вакцините против сезонски грип вчера пристигнаа 44 илјади валентни вакции. Овие вакцини веќе се дистрибуираат и со цел да не се мешаат групите на граѓани коишто доаѓаат за вакцинација против сезонски грип и Ковид – 19, вакцинацијата ќе се спроведе во центрите за јавно здравје и дел во здравствените домови во Скопје каде што нема вакцинација против Ковид – 19. Против сезонски грип освен оваа количина на вакцини, центрите за јавно здравје набавија и 11 илјади комерцијални вакцини, од кои четири илјади се во Скопје. Ќе има и теренска вакцинација во домовите за стари лица и во центрите за пациентите коишто се на дијализа. За здравствените работници ќе се организира еден пункт во Институтот за јавно здравје“, истакна Филипче.
Граѓаните кои сакаат да се вакцинираат против сезонски грип можат да се пријават на сајтот вакцинација.мк по што ќе добијат порака на мобилните телефони за време и место во кое треба да се појават за вакцинација. Во однос на тековната вакцинација против коронавирусот, Филипче напомена дека не постои ризик од примање на двете вакцини во истовреме.
„Сакам да напоменам дека ставот е дека нема никаков ризик ако двете вакцини, таа за сезонски грип и за Ковид – 19 се примат во исто време, а ако не се примат во исто време, нема разлика колкав временски период ќе биде дистанцата помеѓу двете вакцинации“, додаде Филипче.
Ова е четврта година по ред како се спроведува бесплатна вакцинација против сезонски грип за хронично болните пациенти, лицата над 65 години, бремените жени, децата и здравствените работници.
Ребека Спасова МНет