Во рамки на седмото коло од Првата ракометна лига ракометарите на штипски Текстилец запишаа нов висок пораз откако беа декласирани од Драчево со резултат од 38:26. За штипјани ова е шести пораз, а имаат само еден триумф, додека пак Драчево на овој меч беше апсолутен фаворит.
Лазар Стојанов постигна девет гола кај победничкиот тим, а кај штипјани сосема очекувано Филип Џинес беше најдобар со девет реализации.
Неизвесно дерби одиграа Мулти Есенс и Металург РА во меч каде ланскиот суперлигаш беше подобар со 23:22, Партизан дома беше поразен од ланскиот суперлигаш Скопје со високи 27:32.
Младост Богданци со 37:33 го декласираше ланскиот суперлигаш Вардар Неготино со што за домаќинот ова беше важна победа во трката за место во плеј-офот.
Еурофарм Пелистер 2 кој лани испадна од Суперлигата како на тренинг натпревар со 41:11 го декласираше тимот на Јехона, а пак Македонија ЃП го декласираше тимот на Преспа Вардар од Ресен со 27:18.
Колото ќе се комплетира утре со мечот меѓу Овче Поле и Кичево кој се игра во Свети Николе.
Александар Ванев, М-Нет