Во рамки на 15. коло од Третата лига – Исток, лидерот Овче Поле ја потврди одличната форма и со минимална, но злато вредна победа од 1:0 против Победа Валандово направи голем чекор кон задржување на првото место на табелата.
Дербито на колото го оправда епитетот, а домаќините одиграа дисциплинирано и тактички зрело, што на крајот им донесе три бодови и дополнително одлепување на врвот со 34 бода.
Во останатите два натпревари, Хоризонт Турново славеше со 1:0 против Тиверија и продолжува со стабилни партии оваа пролет, зацврстувајќи се во горниот дел од табелата.
Најнеизвесно беше во Дојран, каде Дојранско Езеро и Карбинци одиграа без победник (1:1), резултат кој не им оди во прилог на двете екипи во битката за подобар пласман.
По ова коло, Овче Поле останува лидер со 34 бодови, пред Победа Валандово со 29, додека Ударник е трет со 26 бодови и натпревар помалку. Хоризонт Турново се искачи на четвртата позиција со 25 бодови и сериозно се вклучува во борбата за врвот.
Интересно е што лигата и понатаму се игра со намален број на натпревари по коло, поради откажувањето на дел од екипите, што дополнително влијае врз динамиката и неизвесноста во шампионатот.