Полицијата приведе двајца возачи кои биле затекнати зад волан без да поседуваат возачка дозвола, во одделни сообраќајни контроли спроведени во Радовиш и Кочани.
Во првиот случај, на 24 јули околу 23:55 часот во Радовиш, полициски службеници од ОВР Радовиш го лишиле од слобода 21-годишниот А.Н. од Радовиш. При контрола било сопрено мотоцикл со радовишки регистарски ознаки, а по извршените проверки било утврдено дека младиот возач управувал без да поседува возачка дозвола.
За случајот бил известен јавен обвинител од Основното јавно обвинителство Струмица, а по целосното документирање ќе биде поднесена соодветна кривична пријава по член 297-а од Кривичниот законик за „безобѕирно управување со моторно возило“.
Неколку часа претходно, околу 21:00 часот на улицата „Димитар Влахов“ во Кочани, полициски службеници од ОВР Кочани го лишиле од слобода 42-годишниот И.Г. од Кочани. При сообраќајна контрола бил запрен автомобил „Фолксваген Поло“ со беровски регистарски ознаки, а проверките покажале дека и тој управувал возило без возачка дозвола.
По целосното расчистување и документирање на случајот, против него ќе биде поднесен соодветен поднесок.