Жителите на селата Бурилчево и Теранци да не ја користат водата од локалниот водовод за пиење, откако со вонреден инспекциски надзор и извршени анализи е утврдено дека водата не е безбедна за употреба.
Од Општина Чешиново-Облешево информираат дека, согласно Решението на Агенцијата за храна и ветеринарство, водата за пиење од локалниот водовод во двете села се забранува за употреба.
Забраната ќе биде во сила до обезбедување безбедна вода за пиење.
Од Општината апелираат до сите жители да го почитуваат известувањето и да не ја користат водата за пиење сè до нејзино повторно прогласување за безбедна.
„Во интерес на здравјето и безбедноста на населението, се замолуваат сите жители да го почитуваат известувањето“, се наведува во соопштението.
Од Општина Чешиново-Облешево додаваат дека јавноста навремено ќе биде информирана за сите дополнителни информации и за моментот кога водата повторно ќе биде прогласена за безбедна за пиење.