За божиќните празници сточарите очекуваат добар откуп на јагнињата, ама не се задоволни од цената која се нуди. По 250 денари за килограм жива мера јагне е далку од исплатливо за нив, велат тие. Од друга страна пак, додаваат дека месарниците јагнешкото месо го продаваат многу поскапо на граѓаните и се гледа вистинската неисплатливост во одгледувањето овци.
„Сигурно ќе има откуп на јагниња и очекуваме добар принос. Цената ќе видиме каква ќе биде, бидејќи во месарите е скапо, ама од овде се купува по цена од 250 денари. Не е исплатливо“ – вели Симов.
Влатко Симов од село Карбинци и понатаму останува еден од малкумината кои одгледуваат овци. Но, вели, се е скапо вклучувајќи ја и храната, па овци и стока во селото има се помалку. Дополнително нема млади кои во иднина би продолжиле да се занимаваат со сточарство и земјоделтво, па за неколку години многу тешко ќе може да се најде домашно јагнешко месо.
„Цената на храната се зголеми на 20 денари, се е скапо, а овоа ти го земе за џабе. Сега имам околу 15 јагниња, чувам ги само дома.“ – додава Симов.
Симов со сточарство се занимава многу оддамна, но моментално не произведува сирење и млеко. Вели додека може ќе работи, а потоа овците ќе ги продаде.
Лаура Стојанова Кирчов, М-Нет