Дрвените куќички на Шеталиштето во Штип веќе се поставени, со што започнаа подготовките за претстојната Штипска пастрмалијада. Центарот на градот полека го добива фестивалскиот изглед, а Шеталиштето наскоро ќе биде исполнето со мирис на пастрмалија, добра музика и многу посетители.
Манифестацијата ќе започне во петок во 13 часот, а во текот на двата дена посетителите ќе имаат можност да уживаат во штипската пастрмалија, добра музика и дружење. Се очекуваат гости од цела Македонија, а на сцената ќе настапат Сара Јо, Таско, Лара и уште голем број изведувачи.
Во сабота, вториот ден од Пастрмалијадата, програмата ќе биде посветена и на најмладите, со настапи и изведби на децата од градинките. Вечерта, пак, главниот спектакл ќе се одржи на Градскиот стадион, каде публиката ќе ужива во настапот на големата балканска музичка ѕвезда Жељко Јоксимовиќ.
Одбројувањето започна – Штип е подготвен за уште едно издание на Пастрмалијадата, со традиционална храна, добра музика и многу дружење.
Ева Тушевска, М-Нет