
Македонската фудбалска репрезентација вечерва ја пречекува Словенија во последниот меч од групата фаза во Лигата на нациите, средбата ќе се одигра на Националната арена „Тодор Проески“, а ќе започне во 20:45 часот.
Македонија вечерва ја има последната шанса да освои бодови во Лигата на нациите, по петте порази кои ги имавме, а на последниот меч против Шкотска во Глазгов го постигнавме и првиот гол во Б сегментот на Лигата на нациите со што покрај тоа што немаме бодови, ја имаме и најлошата гол разлика од еден постигнат и дури 12 примени погодоци.
Во нашата група Швајцарија е прва со 13 бодови и обезбеди пласман во А сегментот, а пак Словенија е втора со осум бодови, Шкотска е трета со седум, а последна е Македонија без бодови.
Ако Словенија вечерва слави во Скопје ќе го потврди второто место и нема да чека ма исходот од дуелот меѓу Швајцарија и Шкотска, ако Словенија загуби или ремизира во Скопје ќе треба да се надева на пораз на Шкотска на гостувањето кај Швајцарија.
Во Љубљана нашата репрезентација беше поразена со резултат од 2:0, а на последни пет средби Македонија има една победа од 2:1 над Словенија од 10 октомври 2019 година, Словенија двапати ја добиваше нашата репрезентација, а две средби завршија без победник со идентични 1:1.
Низ историјата двете средби осум пати се соочија меѓусебно, а вкупниот биланс е четири победи за Македонија, две победи за Словенија и две ремија.
Македонија на победа чека од 7 септември минатата година кога со 5:0 го доби Лихтенштајн, а по долгиот пост без гол таа серија беше прекината во Глазгов со голот на Елмин Растодер против Шкотска во поразот од 2:1.
Александар Ванев, М-Нет