Ива Михаилова ја напуштила Македонија и веќе е во Бугарија, иако против неа биле изречени мерки на претпазливост со кои ѝ било ограничено напуштањето на државата. Случајот отвора сериозни прашања за тоа како обвинетата успеала да ја премине границата и покрај ограничувањата, како и за постапувањето на надлежните институции.
Според информациите објавени во бугарските медиуми, Михаилова ја напуштила земјата заедно со својот адвокат, без проблеми при граничните проверки. Нејзиното заминување предизвика дополнително внимание бидејќи претходно судот во Кочани одбил да ѝ ги врати одземените патни исправи, откако побарала да замине на лекување во странство.
Михаилова, која има македонско и бугарско државјанство, е обвинета за сообраќајната несреќа што се случила на 7 октомври 2025 година на патот Кочани – Штип. Во несреќата загинало едно лице, а повеќе лица биле повредени, меѓу кои и самата обвинета.
Според Обвинителството, Михаилова управувала со автомобил со брзина поголема од дозволената и преминала на спротивната коловозна лента, по што дошло до судирот. Нејзината одбрана ги оспорува овие наводи и тврди дека таа не ја предизвикала несреќата.
Нејзиното заминување во Бугарија ја отвора и дилемата дали ќе се врати во Македонија за да продолжи да учествува во судската постапка. Следното рочиште е закажано за 9 ноември, но засега нема потврда дали ќе присуствува.
Како причина за заминувањето се наведуваат влошената здравствена состојба и потребата од медицински третман во Бугарија. Михаилова, исто така, изнела тврдења дека во Македонија била изложена на притисоци поради своето бугарско потекло, но овие наводи не се независно потврдени.
Од македонските надлежни институции засега нема јавно потврдено објаснување за околностите под кои обвинетата ја напуштила државата и покрај изречените мерки.
Останува да се утврди дали судските ограничувања биле правилно евидентирани и спроведени, како било овозможено преминувањето на границата и дали евентуалните пропусти ќе повлечат одговорност. Неизвесно е и како заминувањето на Михаилова ќе влијае врз понатамошниот тек на судскиот процес за сообраќајната несреќа со смртни последици.
Ева Тушевска, М-Нет