Големо славје во „Џексон“: ГКК Штип славеше триумф над Скопје за трета победа во низа

Кошаркарите на ГКК Штип стигнаа до третата победа во низа во Суперлигата, тимот на Марјан Србиновски за првпат оваа сезона постигнаа над сто поени на еден меч, а со новиот триумф се искачи на средината од табелата.

ГКК Штип ја израдува домашната публика во преполниот „Џексон“ откако со 103:94 го доби последнопласираниот Скопје за трета сезонска победа, а пак гостинот останува на ефект од една победа и шест порази на дното од табелата.

Натпреварот во „Џексон“ беше повеќе од возбудлив, а на крајот пресудна беше последната четвртина која го реши победникот. Штипјани одлично влегоа во мечот добивајќи ја првата четвртина со 25:17, а потоа во втората подобар беше скопскиот тим со 27:30.

Третата четвртина му припадна одново на гостинот кој беше подобар со 19:23, а последната четвртина му припадна на домаќинот со 32:24 за конечни 103:94.

Најефикасен тимот на Штип беше Јоркол Пел со 38 поени, на кои придодаде пет асистенции и четири скока. Камерон Хамилтон го следеше со 18 поени.

Кај Скопје одличен меч имаше Колин Паркер, кој оствари дабл-дабл учинок од 29 поени и 14 скока, како и Камерон Џонс со 23 поени и 11 асистенции, но нивниот ефект не беше доволен за да се избегне поразот во градот под Исарот.

Со оваа победа Штип стигна до биланс од три победи и четири порази по седум одиграни кола и се искачи на делба на шестото место на табелата со Кожув со по десет бодови, Скопје со осум бодови е последен на табелата.

МКК Куманово забележа голема победа на домашен терен совладувајќи ја Струмица со 85:48 во меч каде гостинот имаше лошо издание во сите четири четврти. Првата ја загуби со 21:8, втората со 19:11, во третата резултатот беше 23:13, а четвртата заврши со 22:16.

Тиквеш славеше тесна победа на домашен терен од само два поени разлика совладувајќи го Пелистер со 72:70, а пак ТФТ ја доби драмата во Гевгелија по продолженијата совладувајќи го Кожув со тесни 86:88.

Колото се затвара со вечерашното дерби меѓу шампионот МЗТ Скопје Аеродром и непоразениот лидер Работнички.

Александар Ванев, М-Нет