Пролетна генералка денеска се организираше во штипската населба Осми ноември. Жителите на населбата, вработени во двете јавни претпријатија „Исар“ и „Стипион“, општинска администрација и градоначалникот на Општина Штип, Иван Јорданов, ги чистеа дивите депонии низ населбата. Јорданов вели дека ова е втора акција на Општината со цел почиста животна средина.
„Ова е втора еколошка акција и овде сме да ги расчистиме сите наноси на ѓубре и смет на зелените површини во самата населба, а сѐ со цел да ја подигнеме јавната свест и да ја зачуваме животната средина. Во наредниот период ќе продолжиме и во другите населби на територија на општина Штип“, вели Јорданов.
Јорданов посочи дека во ваквите активности е важна и вклученоста на граѓаните, поради што повика да им се придружат во расчистувањето, но и да ја чуваат животната средина и да не ја загадуваат.
„Најважно од се е што граѓаните се вклучуваат во овие активности и заеднички да влијаеме на свеста и за почиста животна средина, вели Јорданов“, додаде Јорданов.
Еколошките акции низ населбите во Штип почнаа минатата недела, а прва се чистеше населбата Автокоманда.
Ребека Спасова М-Нет