Штип и македонската медицинска и академска јавност загубија уште еден голем човек. На 78-годишна возраст почина проф. д-р Никола Камчев, истакнат лекар, специјалист трансфузиолог, универзитетски професор и прв декан на Факултетот за медицински науки при Универзитетот „Гоце Делчев“ во Штип.
Неговото име засекогаш ќе остане поврзано со развојот на медицината, образованието и хуманоста во Штип и источниот регион на Македонија. Беше еден од луѓето кои не само што ја градеа својата професионална кариера, туку оставија трајна трага и создадоа можности за генерации кои доаѓаат.
Камчев голем дел од својот работен век го посвети на медицината, работејќи во Медицинскиот центар во Штип и Регионалниот центар на Институтот за трансфузиона медицина. Како специјалист трансфузиолог, со својата стручност и посветеност придонесе за унапредување на здравствената заштита во регионот.
Но, неговото дело не застана во болничките ходници. Тој беше еден од визионерите на високото медицинско образование во Штип, иницијатор за отворање на Високата здравствена школа и Факултетот за медицински науки при УГД, каде што ја извршуваше и функцијата прв декан.
Како професор, своето знаење го пренесуваше на бројни студенти, специјализанти, магистранти и докторанти, а како научен работник беше автор и коавтор на бројни трудови од областа на трансфузионата медицина, хематологијата и коагулационите нарушувања.
Посебно место во неговиот живот имаше хуманоста. Со години беше посветен на доброволното крводарителство и хуманитарната работа во рамките на Црвениот крст на Македонија, активно учествувајќи во акции и проекти со кои се спасувале животи и се помагало на оние на кои им била потребна помош.
За неговиот животен пат, професионален придонес и визија сведочат и монографиите „Проф. д-р Никола Камчев – живот и дело“ и „Сон претворен во реалност“.
Зад себе остава дело кое нема да се мери само со професионалните титули и признанија, туку и со генерациите лекари и здравствени работници кои ги образувал, со институциите во чие создавање учествувал и со хуманоста што ја ширел.
Погребот на проф. д-р Никола Камчев ќе се одржи утре, од 13 до 14 часот, на Градските гробишта во Штип.