Македонската атлетика доби уште една причина за гордост. Младата Ева Митевска оствари извонреден успех на Младинските олимписки игри во Дакар, Сенегал, откако обезбеди пласман во финалната трка на 100 метри и го освои осмото место во конкуренција на најдобрите млади спринтерки.
Митевска до големото финале стигна преку одличен настап во полуфиналето, каде што ја заврши трката на четвртата позиција со време од 12.58 секунди. Со овој резултат, македонската репрезентативка се најде меѓу деветте финалистки, што претставува значаен успех за македонската атлетика.
Во финалната трка, младата атлетичарка покажа дополнителен квалитет и брзина, постигнувајќи резултат од 12.28 секунди, доволен за осмото место. Времето беше остварено со ветер од +2.4 метри во секунда, над дозволената граница за официјално признавање на рекорди, но тоа во никој случај не ја намалува вредноста на нејзиниот настап.
Со неполни 18 години, Митевска веќе се наметнува како едно од најголемите имиња на новата генерација македонски атлетичари. Настапот во Дакар е потврда за нејзиниот потенцијал, посветеност и можностите за уште поголеми достигнувања на меѓународната сцена.
Пласманот во финалето на едно вакво големо натпреварување е значаен момент не само за Ева и нејзиниот тренер, туку и за македонската атлетика во целина.
Атлетската федерација на Македонија изрази гордост од постигнатиот резултат и упати честитки до младата спринтерка и нејзиниот тренер за успешното претставување на државата.
Александар Ванев, М-Нет