Трката за врвот во Третата лига – Исток, регион 3, станува сè поинтересна. Победа Валандово и Огражден Ново Село се на делба на првото место со по 13 бодови, а зад нив четири екипи имаат по осум бодови и остануваат во игра за повисок пласман.
Во ова коло, Овче Поле оствари убедлива победа од 3:0 против Огражден Ново Село, додека Каменица Саса и Победа Валандово одиграа без победник, 1:1. Дојранско Езеро славеше на гостувањето кај Ударник со 2:1, а Хоризонт Турново минимално ја совлада Слога Виница со 1:0.
Во центарот на вниманието беше малешевското дерби во Берово, каде што Малеш ја совлада Брегалница Делчево со 2:0. За играч на натпреварот беше прогласен Тони Мичковски, кој постигна гол и асистираше, додека Ерол Пилов го одигра својот јубилеен 200. натпревар.
Натпреварот меѓу Тиверија и Карбинци не се одигра поради дисквалификацијата на Тиверија, која е исфрлена од лигата поради непојавување на два натпревари.
Победа има натпревар помалку, четири екипи на делба на третото место
На врвот е Победа Валандово со 13 бодови, колку што има и Огражден Ново Село, но валандовчани имаат подобра гол-разлика и натпревар помалку. Одложената средба со Малеш може да биде важна во борбата за лидерската позиција.
На третото место се израмнети Овче Поле, Малеш, Хоризонт Турново и Дојранско Езеро со по осум бодови.
Каменица Саса и Брегалница Делчево се на делба на седмото место со по седум бодови. Ударник е деветти со четири бодови, Слога Виница е десетта со два бода, додека ОФК Карбинци е на 11. место без освоен бод. Последна е Тиверија, која веќе е исфрлена од лигата.
Резултати од колото
Овче Поле – Огражден Ново Село 3:0
Каменица Саса – Победа Валандово 1:1
Ударник – Дојранско Езеро 1:2
Малеш – Брегалница Делчево 2:0
Слога Виница – Хоризонт Турново 0:1
Тиверија – Карбинци не се одигра