Нема промени во врвот на Втората македонска фудбалска лига, 25. коло не направи речиси никакви промени, останува како што беше и претходно, а фаворитите одиграа според планот, практично оваа рунда не донесе изненадувања.
Брегалница го доби дербито во Радовиш каде со 0:1 славеше над Детонит Плачковица, благодарние на голот на Бојан Рајков, со што штипјани го продолжуваат патот кон Прва лига, односно остануваат на врвот со 56 бодови, а зад „сините“ се Охрид, Скопје и Шкендија Арачиново со по 56 бодови односно конкурентите на Брегалница имаа високи победи.
Охрид со 6:1 ја доби Преспа, Скопје со 7:0 славеше над Саса, а пак Шкендија Арачиново со 5:0 ја доби Победа.
Стрелецот на победничкиот гол во Радовиш, Бојан Рајков, за М Нет телевизија истакна дека чекор по чекор одат кон целта и се надева дека на крај заедно ќе го прослават влезот во Прва лига, што е цел на Брегалица оваа сезона.
Единствен меч без погодоци беше тој во Струмица каде Беласица и Кожуф одиграа 0:0, а тоа значи дека Беласица останува петта со 49 бодови, Осогово кој го доби Тетекс со 2:1 се врати на шестото место и сега отворено го напаѓа петтото место, со тоа што „жетварите“ имаат 47 бодови, а пак радовишани сега се седми со 44 бодови.
Новаци славеше со 1:2 над Големо Коњари и останува осми со 43 бодови, седум повеќе од бараж зоната каде е Кожуф со 36 бодови, десетти е Тетекс со 33 бодови, а пак Саса е 11-та со 29 бодови.
Во зоната за директен испаѓање нема промени. Вардар Неготино сам си пресуди и ја реши својата судбина да испадне во Трета лига – Југ, откако одигра 3:3 против Слога Виница, откако испушти два гола предност.
Тимот од Неготино е на 12. место со 19 бодови, Преспа е место подолу со 12 бодови колку што има и Слога Виница која е на 14. место. Победа е претпоследна со 11 бодови, на дното е Големо Коњари со седум бодови.
Александар Ванев, М-Нет