Со цел заштита на здравјето на најмладата популација потрошувачи односно децата, АХВ почнува со спроведување на засилени вонредни контроли на новогодишните пакетчиња. Во пресрет на новогодишните и божиќните празници, Агенцијата за храна и ветеринарство (АХВ) контроли ќе врши кај сите оператори со храна со цел да се заштити безбедноста на потрошувачите.
„Како одговорна институција за безбедноста на храната, заштита на здравјето на граѓаните и нивните права како потрошувачи, АХВ апелира до операторите со храна да бидат одговорни и да не се обидуваат да манипулираат со потрошувачите, особено со новогодишните пакетчиња, во збирното пакување подметнувајќи и небезбедни производи, најчесто со поминат рок на употреба. За ваквите недоследности, граѓаните веќе алармираат до Агенцијата.“ – велат од агенцијата.
Со засилените контроли кај операторите со храна ќе се утврдува исполнетоста на општите и посебните услови за безбедност на храната, акцент ќе се стави на означувањето, особено на трајноста на производите и заштита на потрошувачите од измама, велат од Агенцијата.
Од АХВ апелираат и до граѓаните да бидат одговорни потрошувачи и храна да купуваат од регистрирани/одобрени објекти кои се под контрола на инспекциските служби на Агенцијата за храна и ветеринарство.
Секоја недоследност во поглед на безбедноста на храната, граѓаните можат да ја пријават во Агенцијата, лично или телефонски.
Лаура Стојанова М-Нет