Близу 400 лица имаат можност да го остварат денес своето гласачко право во Штип. Гласаа штитениците во казнено поправниот дом и болните и немоќните лица во Штип. Гласањето се одвиваше без проблеми и со почитување на здравствените препораки.
192 гласачи од 40 општини има во избирачкиот список во Казнено поправниот дом во Штип. Вообичаената излезеност во штипскиот затвор на гласање во последните неколку гласачки циклуси се движи околу 60 проценти. Денешното гласање во затворот во Штип се одвиваше без прекини или проблеми, со запазување на сите пропишани превентивни здравствени мерки известуваат од избирачкиот одбор. Гласовите од затворениците после затворање на кутиите во 21 часот го започнуваат патот до местото на живеење на гласачите, вели Трајко Јолев Претседател на избирачкото место во затворот во Штип.
Денес во Штип гласаа и 196 болни и немоќни лица. Од Општинската изборна комисија информираат дека и овој изборен процес се одвиваше без застој, вели Претседателот на Општинската изборна комисија Сенка Андреева.
Од Општинската изборна комисија информираат дека се е подготвено за утрешното гласање. Во Штип право на глас имаат 39564 лица кои ќе гласаат на 80 избирачки места.
Славица Величковска
Горан Христовски