Осветен деветметарскиот крст поставен во дворот на црковниот параклис „Свети Димитриј“ во населба Трајано трло во Кочани. По повод одбележување на денешниот празник митрополитот брегалнички господин Иларион го освети крстот, а претходно беше отслужена литургија во чест на празнувањето на светителот.
„Денеска се осветува крстот кој е подигнат како симбол и победа над сето зло. Како што велат ако преку дрвото влезе гревот, преку крстот е спасението. Нека е честито и благословено и нека овој крст сведочи дека овде постои народ христов, народ православен. “ – кажа Иларион.
Голем број верници и покрај дождот беа дел од осветувањето на крстот во Кочани. Со хуманитарни средства кои се собираат се очекува до напролет параклисот да биде завршен внатрешно и надворешно за истиот да може да биде и осветен.
“Денес верниот народ се собра од град Кочани да го прослави празникот посветен на Свети Димитриј и да го осветиме и крстот поставен овде во населбата Трајаново Трло. Се надеваме дека понатаму со помош од народот ќе можеме да го довршиме манастирот, да можеме и да го осветиме.“
Параклисот во Трајаново Трло „Св. Димитриј“ започна да се гради пред една година со благослов на Брегалничката Епархија од страна на Црковниот одбор на храмот преку донации на граѓани и стопанственици. За една година преку донации на граѓани и компании Црковниот одбор успеа да го изѕида храмот, постави нова кровна конструкција и негово уредување.
Лаура Стојанова М-Нет