Ново, модерно, детско игралиште доби населбата Сењак во Штип, донација од рудникот „Боров дол“. Како што посочија од Рудникот, како општествено-одговорна компанија вложуваат во општините на чии територии дејствуваат, а со цел да ги подобрат условите за добробит на заедницата. Акцијата, додаваат, е уште една во низата слични акции.
„Како општествено-одговорна компанија секогаш сме тука да враќаме и да помагаме на заедниците во коишто делуваме. Рудникот „Боров дол“ е отворен во 2020 година и се протега во три општини. Едната од нив е општина Штип и на барање на Општината одговоривме на потребите, односно дониравме едно детско игралиште коешто ќе ги радува малите дечиња, особено сега кога се постојано пред компјутерите“, вели Кристина Крстева, корпоративни комуникации и општествена одговорност на „Боров дол“ и „Бучим“.
Градоначалникот на Општина Штип, Иван Јорданов, посочи дека новото игралиште е резултат на успешната комуникација и соработка со рудникот „Боров дол“. Во овој случај, вели тој, благодарноста е до нив, а понатаму ќе се продолжи со разубавување на детските катчиња во штипските населби.
„Морам да истакнам дека во изминатите неколку месеци, на барање на Општина Штип, искомунициравме, побаравме и како општествено-одговорна компанија „Боров дол“ се одлучи да донира една ваква содржина за најмладите, коишто верувам дека ќе го користат и ќе го чуваат. Нашата цел и тенденција е во секое место да направиме едно вакво катче за рекреација“, вели градоначалникот Јорданов.
Од рудниците „Боров дол“ и „Бучим“ посочија дека општествената одговорност ќе остане дел од нивното работење, што значи дека и понатаму ќе донираат согласно со потребите кои ги имаат општините.
Ребека Спасова М-Нет