По порпаднати тендери и недоговорени провозии ќе биде запаментено владеењето на ВМРО ДПМНЕ во Штип, истакнаа денеска на прес конференција од ОО на СДСМ Штип. Од таму прашуваат зошто е раскинат договорот за реконструкција на кровот на штипската гимназија и дали од пренамената на средствата процент ќе добијат градоначалникот и партијата.
„Владеењето на ВМРО ДПМНЕ во Штип ќе биде запаметено по пропаднатите тендери и недоговорените провизии. Откако Штип остана без градски превоз по пропаднатите два тендери, продпадна и тендерот за реконструкција на кровот на штипската гимназија. По распишаниот тендер за реконструкција на кровот на гимназијата „Славчо Стојменски“, в.д. директорката поставена од градоначалникот Јорданов, го раскина договорот со фирмата изведувач. Јавноста е должна да ја знае вистината:
Која е главната причина за раскинување на договорот и дали некој ќе презеде одговорност?
Дали кровот на гимназијата ќе се обнови и реконструира или тие средства ќе бидат пренаменети за тендер од кој процент ќе имаат Јорданов и ВМРО ДПМНЕ.“ – прашаа од СДСМ.
Времнскиот период е главна причина заради која се раскина договорот, одговори во писмено соопштение директорката на гимназијата Весна Ристова. Вели дека за разлика од претходната година сега ќе се обидат да ги пренаменат средставата во функција на учениците.
„Причина за раскинување на договорот ( со земена согласност со избраниот изведувач) е временскиот период во кој би се изведувале градежните активности т.е. Декември. Се согласивме дека во карактеристични услови за зима и пред крајот на првото полугодие од учебната година, реконструкцијата може да се одрази врз безбедноста на учениците и вработените и врз изведувањето на наставата. За разлика од минатата година, кога имало средства и завршена тендерска постапка средствата беа неискористени и повлечени. Сега ќе се обидеме да ги пренамениме во функција на учениците.“ – врати директорката Ристова.
За реконструкција на кровот на штипската гимназија беа одобрени средства во висина од речиси три милиони денари.
Лаура Стојанова М-Нет