Со вкупно 2.900 вакцини во штипскиот Центар за јавно здравје започнува вакцинацијата против сезонски грип. Граѓаните кои се пријавиле за вакцинација преку веб-страницата вакцинација.мк преку СМС-порака добиваат известување за точниот датум, час и место за вакцинирање. Вакцинацијата се врши во сите центри за јавно здравје низ државата, а директорката на штипскиот Центар, Марија Димитрова, посочува дека денеска се вакцинирани околу 20 – 30 граѓани.
„Од денес почнува вакцинацијата за сезонски грип, и со бесплатни и со комерцијални вакцини. Вкупно добиени дози имаме 2.800 за бесплатните вакцини и 100 дози за комерцијални вакцини. Цената на комерцијалните оваа година ќе биде 700 денари. Оние што се бесплатните вакцини се за ризичните групи: хронично болните, лица постари од 65 години, здравствени работници, бремени жени и деца до шест години“, вели Димитрова.
Од Министерството за здравство велат дека вакцинацијата против сезонски грип е најефикасна мерка за превенција на грип, која спречува појава на потешки форми, компликации и смртен исход, особено кај ризичните групи. Директорката Димитрова, пак, повика оние кои имаат проблем со пријавувањето да се обратат кај нив.
„Бројката моментално не ја знаеме, бидејќи пријавата оди преку системот вакцинација.мк, ги координира „Мој термин“, распоредени се во време од 5 до 10 минути, така што немаме гужва. Сите оние што ќе бидат пријавени во „Мој термин“ ќе добијат бесплатна вакцина. Апел до граѓаните е да се пријавуваат, особено ризичните групи, а ако имаат проблем со пријава, може да дојдат кај нас да направиме пријава на вакцинација.мк“, додава Димитрова.
Обезбедени се вкупно 60.000 четиривалентни вакцини против сезонски грип за ризичните групи, кои се бесплатни, а досега интерес во цела држава пројавиле над 30.000 граѓани.
Ребека Спасова М-Нет