Од утринава во дигиталната судница во Идризово продолжи судењето за пожарот во дискотеката Пулс во Кочани. Но адвокатите го оспорија фактот дека до обвинетите не е доставено пречистено интегрирано обвинение, туку само до адвокатите. Во тој случај тие не знаат за што се во судница и не можат да се изјаснат дали се виновни или не, велат адвокатите.
„Ние постојано тврдиме, а денес тоа се и покажа дека обвинителството прави грешки и ја одолговлекува постапката. Што се случи деенска, прво големо прашање е дали е изменето или обвинението“ – вели Давидовиќ.
„Однесувањето на обвинителството е несериозно кон Судот и кон семејствата, кон одбраната и кон обвинетите лица. Ако дозволиме било што да помине ние нема да дојдеме до правда“ – вели Шилегов.
Родителите на починатите деца и по осум месеци чекаат правда, бараат виновниците со име и презиме да одговараат за најголемата трагедија во државата во која загинаа 63 лица. Велат дека по првото рочиште имало мала надеж кај нив, и очекуваат судењето да продолжи праведно и фер.
„Се надевам дека судијката која го води судскиот процес ќе продолжи и понатаму исто како и на првото рочиште, праведно и фер. Повеќе од осум месеци ние родителите на починатите деца живееме во агонија и кај мене кога заврши првото рочиште се појави една искра на надеж, а причина за таа надеж е судијката и воведниот дел на обвинителите“ – вели мајка на починато дете.
Судот на денешното рочиште им дозволи обвинетите прво да го добијат обвинението па потоа да продолжат со расправата за изјанување за вина.
Лаура Стојанова Ќирчов, М-Нет