Со емотивна и жестока порака до јавноста, ЖФК Љуботен објави дека става крај на една од најуспешните ери во македонскиот женски фудбал, најавувајќи повлекување по последниот одигран натпревар.
Од клубот посочуваат дека одлуката доаѓа по, како што велат, „неспортски случувања на терените“ и одлуки, кои според нив директно влијаеле врз иднината на клубот.
„Изгуби Тетово, изгуби репрезентацијата, изгуби фудбалот. Згаснува бренд препознатлив во регионот и пошироко“, стои во соопштението на клубот, кој во моментот брои дури десет репрезентативки во своите редови.
Клубот потсетува на својот неверојатен подем во изминатите шест години. Преземен во 2020 година како последнопласиран тим, Љуботен успеа да се трансформира во доминантна сила во женскиот фудбал.
Веќе во сезоната 2021/2022 беше освоена првата шампионска титула, а потоа следуваа и повеќе „дупли круни“, со што клубот стана синоним за успех.
Паралелно со резултатите, се инвестираше и во инфраструктура и професионализација – ангажирани странски фудбалерки, воведени кондициони тренери, организирани подготовки, па дури и сопствен тренинг камп, фитнес центар и услови кои ретко ги имаат и машки клубови во државата.
Љуботен постави нови стандарди и на меѓународна сцена. Клубот забележа победа во квалификациите за Лигата на шампионите, а во последната сезона направи историски исчекор со пласман понатаму во квалификацискиот циклус, совладувајќи шампиони од Ерменија и Фарски Острови.
Дополнително, клубот беше пионер и во примената на модерна технологија, користејќи GPS системи за следење на перформансите на фудбалерките – нешто што ретко се гледа во женскиот фудбал во регионот.
Во своето обраќање, од Љуботен упатија сериозни критики кон раководните структури во македонскиот фудбал, обвинувајќи за недостаток на поддршка и неправедни одлуки.
Истовремено, посочуваат дека бројни амбициозни проекти остануваат нереализирани – меѓу нив изградба на модерен тренинг центар со хотел, сопствен клупски автобус и враќање на машкиот клуб Љуботен на фудбалската мапа.
На крајот, од клубот упатија благодарност до сите фудбалерки, тренери, менаџери и интернационалки кои биле дел од оваа успешна приказна, нагласувајќи дека нивниот придонес ќе остане запишан во историјата.
Со ова, ЖФК Љуботен затвора едно поглавје исполнето со успеси, трофеи и визија – но и остава сериозна празнина во македонскиот женски фудбал.