Општина Карбинци го добива првото доброволно противпожарно друштво, кое ќе го носи името „Баргала“. Станува збор за проект кој се реализира преку ЛАГ Плачковица во соработка со општината, а целта е да се превенира навремено при евентуално појава на пожари летниот период. Како што истакна градоначалникот, Виктор Пуанов, ова е од големо значење за општината, бидејќи придонесува самостојно да се справуваат со ситуации на пожари, кои изминатите години беа чести.
„Важното за нас како Општина Карбинци е дека ќе превземе чекори кои ќе бидат важни за превенција од пожари кои би се случувале на територија на Карбинци. Се надевам дека оваа година ќе можеме и ние самите да постигнеме нешто повеќе за справување со овие ситуации“ – вели Паунов.
За почеток има пријавено околу 12 лица кои во наредниот период ќе следат соодветни обуки и ќе добијат сертификати за да може да дејствуваат за време на пожари. Дополнително ќе се обезбеди и соодветна опрема за потребите на доброволното друштво, дел со средства од проектот и општината, друг дел преку донации, како и од Дирекцијата за заштита и спасување.
„Ваквите доброволци покрај тоа што ќе можат да интевенираат, може да помогнат и во други активности кои се за поддршка на заедницата на граѓаните. Бројот не е ограничен може сите кои се физички здрави согласно законот од 18 до 55 години може да членуваат во друштвото“ – вели Георгиев.
Проектот за формирање доброволни противпожарни друштва преку ЛАГ Плачковица се реализира во четири општини, Штип, Карбинци, Конче и Радовиш, а ова е трето формирано друштво во рурална средина.
Лаура Стојанова Ќирчов, М-Нет