Ракометарките на Астибо од Штип загубија од Куманово на гостински терен со резултат од 34:27 во меч од 16. коло на Суперлигата.
20-тина минути Астибо резултатски се држеше, а потоа Куманово успеа да направи разлика и да се одлепи на 19:13 на полувреме. Веќе стекнатата предност Куманово само ја одржуваше, а Астибо немаше сили да направи изненадување, па се соочи со пораз и во Штип се врати без бодови.
Марија Анчева очекувано беше најдобар стрелец за Астибо со 14 погодоци, но недоволно за триумф, а пак кај Куманово, исто така, очекувано најдобра беше Мариана Силва Азеведо, која постигна девет гола.
Шампионот Ѓорче Петров го декласираше Пелистер во Битола со убедливи 10:32 во меч кој за „лавиците“ беше само тренинг и меч на рутина.
Чаир го доби соочување со Вардар откако славеше со 33:27, со одлично отварање на мечот, кога Чаир имаше серија од 7:1, а на полувреме беше 17:11. Лошото отварање на натпреварот се рефлектираше во второто полувреме и вардарки немаа сила за да стигнат до изненадување против фаворитот, па се соочија со пораз.
Биљана Дамчевска со девет гола беше прво има кај Чаир, а пак кај Вардар се истакна Ивана Трифуновска со шест гола.
Спартак доби службени бодови од мечот со откажаниот Металург Автокоманда.
Во однос на табелата Ѓорче Петров е на врвот со 29 бодови, Чаир е втор со 20 бодови, формално на табелата на третото место е Металург Автокоманда со 20 бодови. Вардар е четврти со 18 бодови, Куманово е петти со 13 бодови, екипата на Астибо од Штип го држи шестото место со седум бодови, Спартак е седми со шест бодови и го напушти дното, а на последното место е Пелистер со четири бодови.
Александар Ванев, М-Нет