Статистиките покажуваат дека децата најмногу страдаат во сообраќајни незгоди. Водејќи се по тоа од Републичкиот совет за безбедност во сообраќајот по патиштата апелираат до родителите да возат одговорно и да внимаат на децата. Но, и да користат детско седиште.
„Податоците од сообрачајните контроли и податоците од продажбата на детски седишта покажуваат дека во изминатите неколку години имаме зголемено користење на детски седишта“ – соопшти Манчев.
Користењето на детско седиште е многу важно заради безбедноста на децата. Честа е појавата кога децата се возат во автомобилот во опасни позиции, или се држат во раце од страна на родителите.
„За жал истражувањата покажуваат дека кога детето не е врзано со појас тоа најчесто стои, и тоа или е свртено и гледа наназад, или стои со главата свртено кон двете предни седишта. И едната и другата ситуација е крајно опасна“ – истакна Манчев.
Иако постои тенденција на зголемена употреба на детски седишта во автомобилите, сепак, евидентен е фактот дека бројот на родители/возачи кои не користат детски седишта за превоз на деца до 5 години не е мал. Според истражувања на релевантни меѓународни организации, во случај на сообраќајна незгода, детските седишта ја намалуваат смртноста кај децата за 50 отсто, а кај бебињата и до 70 проценти.
Лаура Стојанова М-Нет