Ракометарите на Текстилец УГД од Штип забележаа нова победа во Првата лига, откако на гостувањето во рамките на 2. коло славеа над Македонија ЃП со резултатот од 34:36.
Домаќинот имаше одлично отварање на резултатот, но потоа штипјани ги презедоа работите во свои раце и го имаа водството во текот на целиот натпревар.
Со по девет гола кај Македонија ЃП се истакнаа Бојан Чакалиќ и Михаел Тотиќ, а пак штипјани прво име беше Филип Џинес со осум гола, а Јован Величков имаше седум реализации.
Бодовите останаа во Свети Николе, откаок Овче Поле славеше победа над Аеродром со резултат од 32:31, со тоа што Филип Петровски со осум голови беше најдобар стрелец кај домашните, а кај гостите Бојан Божиновски постигма девет гола.
Дебитантот Сокол Саса од Македонска Каменица го претрпе вториот пораз откако тимот беше поразен на гостувањето кај Шампион со високи 38:30. Мирче Ѓеоргиев за тимот од Македонска Каменица имаше 12 гола, но недоволни за позитивен резултат.
Партизан на домашен терен ја доби Преспа со 29:27, новајлијата Илинден беше убедлив против Јехона со 37:28, а пак Пролет ја доби драмата со Вардар Неготино, откако скопскиот тим имаше негатива од седум гола, а на крај славеше со 24:25.
Неизвесно беше синоќа и во салата „25 Мај“ каде Радовиш и Драчево Јуниор ги поделија бодовите откако двете екипи одиграа 33:33.
Александар Ванев, М-Нет