Течат последните подготовки за вечерашниот концерт „Македонијо, во срце те носиме“ на Градскиот плоштад „Слобода“ во Штип. Концертниот караван започнува од Штип, во 20:00 часот, а истовремено ќе биде промовиран и новиот изглед на Градскиот плоштад, кој денеска се уредуваше од страна на екипите на ЈП „Исар“, а веќе во функција е и новата фонтана.
„Одлучивме во Штип познатите македонски изведувачи, пејачи, настапат и ги испејат познатите македонски патриотски песни. Целта е да се подигне чувството на припадност, да се продолжи македонската традиција, култура, да се истакне нашата песна, она коешто се негира и она коешто во изминативе неколку години не го слушнавме“, вели градоначалникот, Иван Јорданов.
Штипјани се задоволни од новиот изглед на Градскиот плоштад. Повеќето изразија и желба да бидат дел од вечерашниот концерт, за кој е обезбедена и линија во рамки на градскиот превоз.
Инаку, новиот изглед на Градскиот плоштад е во вредност од 3,5 милиони денари, сума без ДДВ, обезбедена од општинскиот буџет. Изведувачот е избран по јавна набавка, а во хортикултурното и партерно уредување на просторот со повеќе зимзелени и нискостеблести садници, промената на урбаната опрема со нови канти за отпадоци, бојадисување на постоечките жардињери и клупи учествуваа двете јавни претпријатија.
Ребека Спасова М-Нет