Трговците со нафтени деривати реагираат на одлуката на Регулаторна да ја скрати маржата за горивата. Тие велат дека барале маржата да се зголеми, а не да се намалува, како што е и одлуката. Освен тоа што работат со загуби, сега веќе може да се предизвика криза во снабдувањето и тие да бидат принудени да ги затворат бензинските станици. Мерката може да создаде само дополнителна паника, зголемена побарувачка и недостиг на гориво, сметаат тие.
„Намалувањето на маржата кај сите бензинските станици ќе се одрази негативно. Колку за пример, во 1999 година горивото беше 29 денари за дизел, а маржата беше 3 денари 20 пари. Денеска горивото е 94 денари, а маржата е 1,5 денари. Јасно е дека со ваквото драстично намалување нема да може да набавиме гориво и ќе ја води работата само во надолна линија. Ние и онака цела недела работиме со загуби, а полош период никогаш немало.“, вели претседателот на Здружението на брендирани и приватни бензински пумпи кои работат во Источниот дел од државата.
Како што додаваат од Здружението, оние што ги носат одлуките треба да имаат предвид дека маржата се намалува, а придонесите се на исто ниво, што значи дека и понатаму тие треба да плаќаат струја и трошоци и да исплаќаат плати. Поради крајно непазарните услови, нема да имаат избор и ќе стават клуч на бензинските станици, дециден е претседателот.
Ребека Спасова М-Нет