Промената на температурите на дневна основа, честите врнежи и летото, кое иако е на прагот, сѐ уште не пристигнало во полн ек носи низа здравствени проблеми кај луѓето. Главоболка и малаксаност, се некои од најчестите проблеми, а најмногу се појавуваат кај оние кои веќе примаат некаква терапија. Во ваков случај лекарите советуваат редовно примање на терапијата.
„Видовме дека некако летото задоцни и поради сите овие климатски промени, еве, да кажеме, поминувајќи низ неколку периоди во текот на денот со врнежи, сонце, облачно, секако дека организмот на сите ни реагира, на некои повеќе, на некои помалку. Меѓутоа, едни од најчестите симптоми се главоболката, малаксаноста, хипотензијата, односно нискиот крвен притисок. Оние што се метеопати најмногу ја посетуваат нашата амбуланта и овде даваме совет. Оние што веќе имаат хронична терапија, редовно да ја примаат, особено оние што имаат проблем со крвниот притисок“, вели д-р Митрова.
Блага физичка активност може да помогне за ублажување на симптомите на главоболка и малаксаност кај оние кои се здрави. Се препорачува лесна и здрава храна, наместо обилни оброци.
„Соодветна хидратација и блага физичка активност за оние што можат. Да се избегнува зачинета, многу солена храна, хидратација, свеж зеленчук и свежо овошје, што овој период изобилува, да биде едно основно мени без мрсни и обилни оброци“, додава д-р Митрова.
За метеопатите препорачливо е да се поминува време на свеж воздух, лесно пешачење, со цел да се подобри циркулацијата и да се спречи влошувањето на тековните состојби.
Ребека Спасова М-Нет