Вечерва Штип навива за Македонија! Бесплатен влез за дуелот со Естонија, Ива Колева пред домашната публика!

Штип вечерва ќе биде во знакот на репрезентативната кошарка! Женската кошаркарска репрезентација на Македонија ќе ги одмери силите со Естонија во спортската сала „Џексон“, а влезот за сите љубители на кошарката е слободен, меч во рамките на претквалификациите за Евробаскетот 2029 година. Македонските репрезентативки ќе имаат можност да настапат пред полни трибини и со силна поддршка од штипската публика, која и овојпат може да биде дополнителен мотив во борбата за позитивен резултат. Штипјани имаат и посебна причина да ја наполнат салата – во македонскиот состав е нивната сограѓанка Ива Колева. Настапот на штипската кошаркарка во националниот дрес е дополнителен повод љубителите на спортот да дојдат во „Џексон“ и да ја поддржат репрезентацијата. Дуелот против Естонија е нов предизвик за македонските кошаркарки, кои ќе се обидат со борбена и пожртвувана игра да стигнат до посакуваниот резултат, по поразот од Романија во гости во првиот меч. Вечерашниот натпревар е можност Штип уште еднаш да покаже дека знае да живее за спортот, а исполнетите трибини да бидат силен ветер во грбот на нашите репрезентативки. Натпреварот меѓу Македонија и Естонија започнува во 18 часот.

Александар Ванев, М-Нет