Вардар со победа ја отвори новата сезона во Првата македонска фудбалска лига, откако на Арената „Тодор Проески“ во Скопје ја совлада Брегалница со 2:0.
Домаќините поведоа во 27. минута, кога по асистенција на Спахиу, прецизен беше Данев за 1:0.
Само три минути подоцна Вардар повторно ја затресе мрежата преку Горан Закариќ, но по реакција на ВАР беше утврдено дека претходно играл со рака, па погодокот беше поништен.
Брегалница не се предаде и одигра храбар натпревар, создавајќи неколку опасни ситуации пред голот на Вардар. Најдобрата можност за израмнување ја имаше Мартин Стојанов во 65. минута, но неговиот удар беше одлично одбранет.
Кога штипјани тргнаа по израмнување, Вардар ја искористи шансата во завршницата. По асистенција на Родригес, Горан Закариќ овојпат беше сигурен и ги постави конечните 2:0.
И покрај поразот, Брегалница остави добар впечаток со борбена и храбра игра против еден од фаворитите во шампионатот, но на крај Вардар ги освои трите бода на мечот од новата сезона во ПМФЛ.