Да се променат Законот за полиција, Законот за внатрешни работи, Работни односи и Кривичниот законик побараа полицајците од протестот во Штип. Поради крајно сериозната ситуација во полициската служба и честите напади и закани врз полицајци, бараат минималната казна затвор за напад на полициски службеник да биде пет години. Бројката на нападнати во последниве месеци е над 100, вели претседателот на Независниот синдикат на полицијата, а наскоро таа бројка ќе биде видлива за јавноста на скопската Триумфална порта.
„Бројката надмина повеќе од 100 повредени, нападнати полицајци. Пред десетина дена отпочнавме со симболичен бројчаник, кој за брзо време јавноста ќе го види пред Триумфалната капија, а со кој ќе се бројат нападнатите полицајци од лошите закони кои во моментов ги има Македонија, не заради полицајците, заради иднината на моите внуци, на вашите внуци и на цела држава. Законите мора да се прилагодат на европските закони“, вели Гоце Делчев Тодев, претседател на НСП.
На ризичните услови за работа реагира и затворската полиција. Палење на возила на затворски полицајци, закани по нивните семејства, се само дел од ризиците со кои се соочуваат, вели претседателот на Независниот синдикат при штипскиот Затвор. Освен што се соочуваат со закани и напади, додава тој, работат и за минимални плати.
„Имаше напад на колеги при извршување претрес во просториите на КПД Штип, имаме најмалку десет повредени колеги. Се има случувано палење на возило на колеги, закани на колеги по фамилии, по деца. Моментално состојбата на полицајците е на некое најниско ниво. Немаме плати, платите ни се ниски. Во затворска полиција има и минимална плата. Работиме ризични работи, со доживотно осудени лица“, вели Тихомир Ивков, претседател на Независен синдикат на затворската полиција при КПД Штип.
„Губиме животи, губиме трпение, нашите семејства брутално се нападнати од луѓе кои се виновни по основ на многу закони. Ги напаѓаат полицајците, тие не одговараат, а нашите полицајци 320 од нив се со одземено оружје, а вршат службени работи. Работата е многу сериозна“, додава Делчев Тодев.
Протестниот караван започна од пред Градскиот стадион во Штип, од каде Независниот полициски синдикат се движеше до Плоштадот „Слобода“. По првиот ваков протест, ќе следуваат уште два во Источна Македонија и три во Западна, а централниот ќе се организира во Скопје.
Ребека Спасова М-Нет