Нови 3.900 работни места со вкупна инвестиција од 205 милиони евра за десет години, тајванската корпорација „Јагео“ ќе инвестира во штипската и скопската ТИР зона. Ова е најголемиот инвестициски договор што денеска во Тајпеј го потпишаа директорот на Дирекцијата за технолошко-индустриски развојни зони, Јован Деспотовски, и првите луѓе на тајванската корпорација. Преку видео за значајноста на инвестицијата зборуваше и премиерот Ковачевски.
„Станува збор за водечка мултинационална компанија за производство на електронски компоненти, која има силно глобално присуство и свои производствени и продажни капацитети во Азија, Европа и Америка со 40.000 вработени ширум светот. Електронските компоненти кои ги произведуваат и кои што се еден од светските најдобри производители за чип-отпорници и тантал кондензатори се користат за авионската и автомобилска индустрија, 5G и телекомуникации, индустрија, медицина, управување со енергија, зелена енергија и слично. Со новиот концепт на поттикнување инвестиции успеавме да ја ставиме нашата земја доста високо на мапата инвестициски дестинации кои имаат капацитет и услови да реализираат висококвалитетни инвестиции од кои ќе имаме бенефит и како држава, но уште поважно инвестиции кои носат директен бенефит за граѓаните во државата“, истакна Ковачевски.
Освен производство, „Јагео“ планира и развојни и истражувачки проекти во соработка со македонските универзитети. Главниот извршен директор посочи дека производствениот капацитет во Скопје ќе се гради догодина, а во втора фаза и во Штип.
„Направивме многу истражувања, но главната причина за нас да ја донесеме конечната одлука како групација беше 10-годишното искуство исто така и позитивниот однос и поддршка на Владата. Тоа се двата најважни фактори за нас, стабилноста на државата и квалитетната работна сила. Два производствени капацитети ќе се градат во Скопје, првиот во јули догодина, а потоа во втора фаза и во Штип.“ – вели Дејвид Ванг, главен извршен директор на „Јагео“.
Ковачевски посочи дека последниве две години се постигнати договори од над 650 милиони евра, а со оваа инвестиција се надминува износ над 850 милиони евра. Според него, во зоните има 16.500 вработени, а првиот квартал бележи речиси една милијарда евра извоз што е највисоко ниво во последниве пет години.
Ребека Спасова М-Нет